Era mineria dera Val d’Aran

Aquest libre preten recuperar ua part importanta dera istòria recenta deth nòste territòri. A primèrs deth sègle XX, quan era economia familiara ère basada ena ramaderia e agricultura de subsisténcia, era indústria minaira representèc ua preciosa entrada de sòs enes larèrs e supausèc era arribada dera revolucion industriau en tèrres araneses. Passat ja mès de miei sègle dempús deth barrament des darrères espleites, eth legat patrimoniau que mos a deishat aguesta activitat minaira ei plan important. Batisses, galaries, teleferics… son quauqui des nombrosi testimònis qu’encara podem descorbir pes nòstes montanhes. I traparam un complèt inventari der auviatge minèr aranés damb era descripcion des espleites minères mès importantes, tant des deth punt d’enguarda geologic coma istoric. S’a realitzat un notable trebalh de camp e s’a recuelhut informacion des archius des empreses minères espleitadorres qu’auie demorat inedita enquià aué. Non auem enes mans ua guida d’excursions – d’autes publicacions complissen aguest objectiu perfèctament – mès se tracte d’un complement preciós entà toti aqueri que pendent es sòns recorruts descorbissen aguest auviatge e vòlen aprigondir ena sua istòria. Gràcies ara volontat des institucions qu’an hèt possible es estudis, aguest libre mos aportarà ua prumèra aproximacion ara importància que, pendent un brèu periòde, auec era mineria en desvolopament economic e sociau d’Aran.